Прэзентацыя праекту ТБМ “Дыялог” пройдзе ў Лідзе Гродненскай вобласці 13 снежня.

У Лідскай цэнтральнай раённай бібліятэцы імя Янкі Купалы выступіць намеснік старшыні ТБМ Алена Анісім.

Алена Анісім:

“Праект прадугледжвае сустрэчы з вядомымі гісторыкамі, краязнаўцамі, фалькларыстамі і мовазнаўцамі. У першую чаргу мы зацікаўленыя ў тым, каб людзі пазнаёміліся са зменамі ў правапісе беларускай мовы, якія пачнуць дзейнічаць як закон з верасня 2010 году. Мы б хацелі, каб гэтыя змены, якія выклікаюць вельмі шмат пытанняў, сталі агульнавядомымі. Удзельнікі праекту таксама змогуць азнаёміцца з багаццямі беларускага фальклору, з асновамі традыцыйных нацыянальных рамёстваў, святамі беларускага народнага календара.

У рамках моладзевага дыскусійнага клуба будуць абмяркоўвацца розныя актуальныя праблемы, у тым ліку пытанні гістарычна-культурнай спадчыны. Усё гэта дапаможа людзям усвядоміць сябе менавіта беларусамі – носьбітамі традыцыйнай культуры карэннай нацыі краіны”, – паведамляе БелаПАН.

Распачнецца сустрэча-прэзентацыя ў 14.00 у канферэнц-залі.

Уваход вольны.

Бібліятэка знаходзіцца па адрасе: вул. Савецкая, 16.

Прэзентацыя адбудзецца ў межах кампаніі “Будзьма беларусамі!”