“Будзьма на Гарадзеншчыне”

09 - 10 кастрычніка 2008 Беларускае добраахвотнае таварыства аховы помнікаў гісторыі і культуры і тэлестудыя “Брэнтстар” наведалі Ваўкавыск і Горадню ў рамках здымак дакументальнага фільму “Ад Крэва разам назаўжды”, які прысвечаны польскай этнічнай меншасці ў Беларусі. Задачай творчай групы было сустрэчы з прадстаўнікамі польскай дыяспары, як афіцыйнага Саюзу палякаў Беларусі, Саюза палякаў Беларусі пад кіраўніцтвам Анжэлікі Борыс, прадстаўнікоў польскай супольнасці не заангажаваных у грамадскі рух, а толькі ў нацыянальнае культурніцкае будаўніцтва.

Па выніках творчай камандзіроўкі адзняты натурны матэрыял, сабраны шматлікія інтэрўю, што дазволіць адлюстраваць у фільме не толькі гісторыю польскага этнасу ў Беларусі, але і яго сучаснае жыццё з шматлікімі праблемамі, паўстаўшымі ў грамадзе пасля 2005 г.
Здымкі фільма “Ад Крэва разам назаўжды” - працяг цыклу “Суквецце”, што прысвечаны этнічным меншасцям у Беларусі, праца над якім пачалася па ініціятыве і тэлестудыі, і Таварыства, бо на думку удзельнікаў творчага праекта міжэтнічная талерантнасць і гармонія магчымы толькі ў асвечаным грамадстве, якое ўспрымае чужые культурныя традыцыі не як нешта варожае, а як складаную частку агульначалавечага культурнага багацця.

Стварэнне такіх дакументальных фільмаў – спроба пошукаў гармоніі і ўзаемапаразумення сярод розных групаў беларускага грамадства, што спрыяе ўсталяванню і ўзмацненню грамадзянскай супольнасці, аднаму з асноўных інстытутаў сапраўднай дэмакратыі, і дапамагае скансалідаваць усе фрагменты мазаічнай беларускай нацыі ў адзіны этнічны арганізм.

Пад час творчай экспедыцыі адбылася сустрэча старшыні Рэспубліканскай рады Таварыства з мясцовай інтэлегенцыяй, краязнаўцамі, у ходзе якой заснавана першасная суполка Добраахвотнага таварыства аховы помнікаў гісторыі і культуры, куды ўвайшлі, як беларусы, так і прадстаўнікі польскай дыяспары. Суполку ўзначаліў віцэ-прэзэс Клуба радзіны польскай Віктар Вайтчук.

Старшыня Рэспубліканскай рады БДТАПГК Антон Астаповіч

Беларускае добраахвотнае таварыства аховы помнікаў гісторыі і культуры