Баранавічы | Будзьма разам!

Літаратурны дзень у Баранавічах 6 красавіка. Поспех Беларускага Слова

7 красавіка 2011 12:43 | Актуаліі, Літаратура

6 красавіка пісьменнікі Барыс Пятровіч, Эдуард Акулін і Леанід Дранько-Майсюк з творчым візітам наведалі Баранавічы, дзе правялі тры літаратурныя сустрэчы: на філфаку БДУ, у СШ №21 і Польскім доме. Імпрэзы прайшлі ў межах кампаніі “Будзьма беларусамі!” і сабралі агулам больш за пяцьсот чалавек. Пасля паездкі выступоўцы падзяліліся ўражаннямі з сайтам www.budzma.org: “Дзень, пражыты намі ў Баранавічах, прайшоў па-вясноваму ярка і запамінальна. Як заўсёды цёпла і сонечна прайшла сустрэча са студэнтамі-філолагамі Баранавіцкага ўніверсітэта. Было вельмі прыемна, што, нягледзячы на тое, што апошні раз мы выступалі тут аж чатыры гады таму, нас да гэтага часу памятаюць і любяць. З велізарным поспехам прайшлі міні-прэзентацыі трэцяга нумару часопіса “Верасень” і пяцідзясятага, юбілейнага нумару часопіса “Дзеяслоў”. На сустрэчу ў сярэднюю школу №21 былі запрошаныя старшакласнікі з некалькіх навучальных установаў горада. Яна запомнілася інтэрактыўнасцю і дынамізмам. Школьнікі з задавальненнем адказвалі на пытанні літаратурнай віктарыны, паўтаралі вясёлыя паэтычныя радкі, спявалі. У Польскім доме сабралася творчая эліта Баранавічаў. Таму й размова пайшла ў больш сур’ёзным рэчышчы. Прысутных востра хвалявала праблема выжывання беларускай мовы і літаратуры, лёс нацыянальнай культуры і беларускай нацыі. Сваім выступам мы пастараліся пераканаць прысутных у тым, што не ўсё так трагічна, як здаецца на першы погляд і што мы абавязкова пабачым “залацісты, ясны дзень” Беларусі, калі будзем не проста чакаць яго, а набліжаць усімі магчымымі сродкамі, у тым ліку і такімі вось літаратурнымі імпрэзамі”. Сапраўдны дзень беларускай літаратуры і паэзіі ў Баранавічах быў як след падтрыманы шматлікімі прыемнымі памятнымі падарункамі ад кампаніі “Будзьма беларусамі!” для самых актыўных гасцей сустрэчаў. Далей »

Пятровіч, Акулін і Дранько-Майсюк у Баранавічах 6 красавіка

5 красавіка 2011 12:33 | Навіны "Будзьма!"

У межах кампаніі «Будзьма беларусамі!» 6 красавіка пісьменнікі Барыс Пятровіч, Эдуард Акулін і Леанід Дранько-Майсюк з творчым візітам наведаюць Баранавічы, дзе правядуць тры літаратурныя сустрэчы: 11.00. Філфак Баранавіцкага дзяржаўнага ўніверсітэта (вул. Паркавая, 62); 15.30. Баранавіцкая СШ №21. 17.30. Польскі клуб Барыс Пятровіч — празаік, працаваў у абласным і рэспубліканскім друку. З 1990 — адказны сакратар штотыднёвіка «Літаратура і мастацтва». З 2002 — галоўны рэдактар літаратурнага часопіса «Дзеяслоў». Сябра Саюза беларускіх пісьменнікаў (з 1993). Аўтар кніг прозы «Ловы» (1992), «Сон між пачвар», «Шчасце быць», «Жыць не страшна: фрэскі» (2008). Эдуард Акулін — паэт, перакладчык, бард. Аўтар кніг паэзіі “Лес дзённага асвятлення”, “Пяшчота ліўня”, “Крыло анёла”, “Радно”, "Непрычалены човен", галоўны рэдактар часопіса “Верасень”. Леанід Дранько-Майсюк — паэт, з 1982 — рэдактар выдавецтва «Мастацкая літаратура». Сябра СП СССР (з 1984). Аўтар зборнікаў паэзіі «Вандроўнік» (1983), «Над пляцам» (1986), «Тут» (вершы, паэмы, эсэ, 1990), драматычнай містэрыі “На Каляды” і інш. Далей »